ಪ್ರೀತಿ

ಮುಚ್ಚಿಟ್ಟ ಎದೆಯೊಳಗೆ
ಬಚ್ಚಿದಾ ಭಾವಗಳು
ಹಚ್ಚಿ ಹೆಚ್ಚಾಗುತಿದೆ ನೀ ಕಾಣಲು,
ಹೆಚ್ಚೇನು ಹೇಳದಲೆ ಮೆಚ್ಚಿದಾ ಜೀವವನು
ಅಚ್ಚೊತ್ತಿದೆದೆಯೊಳಗೆ ಈ ಪ್ರೀತಿಯು

ಹಕ್ಕಿಗಳ ದೇಹಕೆ ರೆಕ್ಕೆ ಮೂಡಿದ ರೀತಿ
ಪಕ್ಕೆಗಳ ಗೂಡೊಳಗೆ
ನಕ್ಕು ಬೆಳೆದಿದೆ ಪ್ರೀತಿ,
ನಕ್ಕಾಗ ಮಗುವಾಗಿ
ಅಕ್ಕರೆಯ ಸಿಹಿಯಾಗಿ
ಒಕ್ಕೂಟದಲಿ ಬಲವು ಈ ಪ್ರೀತಿಯು

ಬಣ್ಣಗಳ ಲೋಕ ಹಣ್ಣಿನಂತಹ ಸವಿಯು
ಹೆಣ್ಣಿನಾ ವಾತ್ಸಲ್ಯದಾ ಚಿಲುಮೆಯು,
ಕಣ್ಣಿಗೆರಚುವ ತಂಪು
ಬೆಣ್ಣಿಗಿಹ ಮೆದುವು
ನಮ್ಮ ಜನುಮದ ಜೀವ ಈ ಪ್ರೀತಿಯು

ಉಸಿರು

ಅವಳನ್ನು ಕಂಡಾಗ ಮನವಾಯ್ತು ಹೂದೋಟ
ಇರುಳಲ್ಲಿ ಕನಸಲ್ಲಿ ಜೇನು ದುಂಬಿಗಳ ಕಾಟ
 ಬೆರಳೆಣಿಕೆ ತಾರೆಗಳ ಕೊರಳಲ್ಲಿ ಸುತ್ತಿಹಳು
ಬರಿದಾದ ನನ ಬಾಳ ಬೆಳಕಾಗಿ ಬಂದಿಹಳು

ಮೊಗವರಳು ಮಲ್ಲಿಗೆಯು, ಜಗವರಿತು ಬಲ್ಲವಳು
ಸೊಗಸಾದ ಕನಸಲ್ಲಿ ಹೂಬಳ್ಳಿ ನೆಟ್ಟವಳು
ನೊಗವಾಗಿ ಒಲವಲ್ಲಿ ಬಗಲಲ್ಲಿ ಕುಳಿತವಳು
ಹೆಗಲಲ್ಲಿ ಬಲವಾಗಿ ಲತೆಯಂತೆ ಹಬ್ಬಿಹಳು

ಕಣ್ಣೊಳಗಿನಾ ಒಲವು ಹೇಳಲಾಗದ ಭಾವ
ಸಣ್ಣ ಹೃದಯದ ಒಳಗೆ ಅಚ್ಚೊತ್ತಿದಾ ಜೀವ
ನನ್ನೊಡನೆ ಅವಳು ಹಸಿವಸಂತದಾ ಹಸಿರು
ಇನ್ನೇನು ಬೇಕೆನಗೆ ದೊರಕಿತೆನ್ನಯ ಉಸಿರು

ಇರುಳು

ಏನೂ ಕಾಣದ ಹೊತ್ತು, ನೆತ್ತಿ ಮೇಲಣ ಮುತ್ತು,
ಮನಸಲ್ಲಿ ನಿದಿರೆಯನು ಎಳೆಯುತಿತ್ತು.
ಬಾನು ಭುವಿಗಳ ನಡುವೆ ಚಂದ್ರ, ತಾರೆಯನಿತ್ತು,
ಕನಸಲ್ಲಿ ಕರೆಯೋಲೆ ಬರೆಯುತಿತ್ತು.

ಎಲ್ಲಿ ನೋಡಿದರಲ್ಲಿ ಬರಿಯ ಉಸಿರಿನ ಸದ್ದು,
ಕಲ್ಲುಗಳು ಗೊರಕೆಯನು ಹೊಡೆಯುತಿದ್ದು,
ಬೆಲ್ಲದಾ ಬರಣಿಯದು ಬಾಯ್ದೆರೆದು ಕುಳಿತಿಹುದು,
ಮೆಲ್ಲಲಾ ಇರುವೆಗಳು ಒಕ್ಕಲೆದ್ದು.

ಸುತ್ತಿ ಸುಸ್ತಾಗಿಹ ರವಿಯು ಮತ್ತಡಗಿ ಮಲಗಿನು,
ಮುತ್ತಿನಂತೆಯೆ ಶಶಿಯು ಹೊಳೆಯುತಿಹನು.
ಮುತ್ತಿಟ್ಟ ಮನದನ್ನೆ ಭೂದೇವಿ ನಗುತಿರಲು,
ಕತ್ತೆತ್ತಿ ಶಶಿಯು ತಾ ನಸು ನಕ್ಕನು.....