ಕನಸೊಂದ ಕಂಡಿದ್ದೆ ನಿನ್ನೆ ಇರುಳೊಳಗೆ
ಜಗವು ಹಗುರಾಗಿತ್ತು ಬೆರಳೆಣಿಕೆಯೊಳಗೆ
ಗಡಿಯಿಲ್ಲ ಗಡುವಿಲ್ಲ ಧರಣಿಯಾ ಮಡಿಲಲ್ಲಿ
ಪ್ರೀತಿಯದು ನಲಿದಿತ್ತು ಪ್ರತಿಯೊಡಲಿನೊಳಗೆ
ಮತ್ತೇರಲೋಸುಗ ಮದ್ಯವಿರಲಿಲ್ಲ
ಗತ್ತೇರಲೋಸುಗ ಮಹಲುಗಳದಿಲ್ಲ
ಸತ್ಯ ಸುತ್ತುತ್ತಿತ್ತು ಪುರುಸೊತ್ತೇ ಇಲ್ಲ
ಹೊತ್ತು ಕಳೆದಾಗಲೂ ಭಯವಿರಲಿಲ್ಲ
ಜಾತಿಯಿರಲಿಲ್ಲ ಮತವೂ ಇರಲಿಲ್ಲ
ಗಾದಿಗೆ ಗುದ್ದಾಡುವ ಪಕ್ಷಗಳಿಲ್ಲ
ದೇವನಿರಲಿಲ್ಲ ದೇಗುಲಗಳಿಲ್ಲ
ಭಾವನೆಗಳ ಹೂಮನೆಗೆ ಬಾಗಿಲಿರಲಿಲ್ಲ
ಕುರೂಪದ ಅಣಕಕೆ ಚಂದವಿರಲಿಲ್ಲ
ಸೌಂದರ್ಯದ ದ್ವೇಷಕೆ ವಕ್ರವಿರಲಿಲ್ಲ
ಖುಷಿಯೆಂಬ ಆಸ್ತಿಗೆ ಮೇರೆ ಇರಲಿಲ್ಲ
ಹಸಿವೆಂಬ ಭಾದೆ ಯಾರಿಗೂ ಇರಲಿಲ್ಲ
ಮೆತ್ತನೆ ಹಾಸಿಗೆಯಲ್ಲಿ ತಿಗಣೆಇರಲಿಲ್ಲ
ಹೊದಿಕೆ ದಿಂಬುಗಳು ಬೇಕಾಗಿರಲಿಲ್ಲ
ಉದಯಿಸುವ ರವಿಯು ಕೆಲಸಬಿಡಲಿಲ್ಲ
ನನ್ನ ಈ ಕನಸು ಮಂದೆ ಹೋಗಲಿಲ್ಲ
